Xulka Qaranka Kubadda Cagta Soomaaliya ayaa soo bandhigay ciyaar geesinimo iyo go’aan adag lagu xasuusan doono, inkastoo ay ku hareen rigoore kulankii isreeb-reebka FIFA Arab Cup 2025 ee ay la yeesheen dalka Cuman, kaas oo ka dhacay garoonka Abdullah Bin Khalifa Stadium ee magaalada Dooxa.
Ciyaarta ayaa ku dhammaatay 0–0 waqtigii caadiga ahaa, iyadoo Xiddigaha Soomaaliya ay maamulayeen qaybaha muhiimka ah ee ciyaarta, kana muuqatay isku xirnaan, difaac ad-adag iyo dadaal joogto ah oo ay ku cabbireen horumarka uu xulku sameynayo sanadihii u dambeeyay.
Garoonka ayaa waxaa buux-dhaafiyay taageerayaal Soomaali ah oo si mug leh u garab istaagay ciyaartoyda, kuwaas oo codkooda iyo sacabkooda joogtada ahi sare u qaaday niyadda iyo awoodda Xulka Qaranka Soomaaliya.
Maadaama aysan labada dhinac midna shabaqa taaban 90-kii daqiiqo, ciyaarta waxa loo gudbiyay gool-ku-laadyo.
Cuman ayaa ku badisay 4–1, sidaasna waxay ugu gudubtay tartanka, halka Soomaaliya ay si sharaf leh uga hareen inkastoo ay soo bandhigeen ciyaar aad loo ammaani karo.
Waxqabadka xulka Soomaaliya ayaa aad loogu bogaadiyey baraha bulshada iyo khubarada ciyaaraha, kuwaas oo tilmaamay horumar muuqda iyo rajo cusub oo ku aaddan mustaqbalka ciyaaraha Soomaaliyeed.
Fakirkaada waa inoo muhiim ee nala wadaag