Beesha Madhibaan, oo ka mid ah beelaha daga maamul goboleedka Waqooyi Bari ee Soomaaliya, ayaa dhawaan soo saartay qaylo dhan xoogan iyo cabasho ku saabsan saamiga ay ka helaan xilalka kala duwan ee maamulkaas.
Diblomaasi sare Sakariye Qaliif Faarax, oo ka mid ah siyaasiyiinta kasoo jeeda beesha Madhibaan, ayaa si gaar ah ugu hadlay arrintan isagoo waraysi siiyey warbaahinta.
Siyaasi Sakariye ayaa sheegay in beesha Madhibaan lagu dulmiyey saamiga ay ku lahaayeen maamulka Waqooyi Bari, isagoo tilmaamay in beelo kale lagu daray saamiga beesha Madhibaan ee qaybinta xilalka.
Wuxuu sidoo kale carabka ku adkeeyay in beesha Madhibaan ay u baahan tahay cadaalad iyo in la tixgeliyo xuquuqda iyo saamiga ay ku leeyihiin maamulkaasi.
Cadaalad la’aanta haysata beesha Madhibaan waxay dhalinaysaa cadaawad iyo niyad-jab, waxaana muhiim ah in dhammaan beelaha ay helaan saamigooda saxda ah,” ayuu yiri Sakariye Qaliif Faarax.
Arrintan ayaa ku soo beegmaysa xilli maamulka Waqooyi Bari uu qorsheynayo in uu maanta qabto doorashada Madaxweynaha iyo Madaxweyne ku-xigeenka, taasoo xiiso gaar ah gelisay xaaladda siyaasadeed ee deegaanka.
Beesha Madhibaan ayaa lagu tilmaamaa beel muhiim ah oo leh saameyn siyaasadeed, waxaana la rajeynayaa in arrimaha saamiga xilalka ay sii kordhiyaan wadahadalada iyo dhexdhexaadinta siyaasadeed ee maamulka.
Si kastaba, arrintan waxay keentay muran iyo dheellitirnaan la’aan saami-qaybsiga, waxaana bulshada gudaha iyo dibedda laga sugayaa in xal rasmi ah loo helo.
Fakirkaada waa inoo muhiim ee nala wadaag