Wayne Rooney ayaa sheegay in Rashford uu jeclaan lahaa inuu ku laabto Manchester United, kaddib markii uu dib u helay qaab ciyaareedkiisii ugu fiicnaa isagoo amaah kula jooga Aston Villa.
Rashford ayaa u wareegay kooxda Midlands ee Aston Villa bishii Janaayo, isagoo heshiis amaah ah ku yimid, kaasoo Villa u oggolaanaya inay si rasmi ah ugu iibsadaan £40 milyan. Laakiin, iyadoo Rooney uu ka hadlayay cayaaraha Champions League ee Amazon Prime intii lagu guda jiray guuldarradii Villa ka soo gaartay PSG, halyeeyga Manchester United wuxuu ku adkaystay in Rashford uu weli awoodo inuu dib u bilaabo xirfadiisa Red Devils.
Rooney wuxuu yiri: “Marcus Rashford wuxuu rabaa inuu u ciyaaro Manchester United, boqolkiiba 100. Waa wiil Manchester ka dhashay, taageere United ah, sannadihii u dambeeyayna waxay u ahaayeen kuwo adag. Wuxuu u baahnaa inuu ciyaaro, waxayna caddaatay inuusan heli doonin fursad uu ku ciyaaro inta ka dhiman xilli ciyaareedka United. Dhab ahaantii wuxuu jeclaan lahaa inuu dhaxal uga tago kooxda. Inay taasi suuragal tahay ma hubo, laakiin waxaan jeclaan lahaa inaan arko.”
Rashford ayaa ka tagay United kaddib markii uu muddo dheer hoos u dhacay, taasoo keentay in tababaraha cusub Ruben Amorim uu ka reebo qorshihiisa. Xiddiga 27 jirka ah wuxuu dhaliyay 15 gool intii u dhaxeysay August 2023 iyo Janaayo 2025, balse wuxuu si weyn uga soo fiicnaaday Villa isagoo saddex gool dhaliyay, isla markaana kursiga keydka dhigay weeraryahanka Ollie Watkins.
Fakirkaada waa inoo muhiim ee nala wadaag